又揀錯佬 楊思琦情夫周身債
2011年07月13日
Face
我好委屈！（真實對白）
自從上月 28日思琦妹單方面向傳媒爆出分手後，傳聞即時滿天飛，至週日（ 10日）楊思琦始肯公布新歡真身，並澄清沒有懷孕。《蘋果日報》圖片
楊思琦曾經無懼無綫雪藏，跟豪仔（李泳豪）九年情愛得轟烈，最近卻突然話思琦貪錢轉冧富貴新歡吳帥（ Andy Ng），男友阿哥李泳漢更日日拍咪數臭思琦妹，慳妹變港女人辦個個插。
被人圍插未算慘，本刊更發現思琦新歡吳帥雖貴為前香港跳水隊代表，又傳係煤礦富商，但原來吳帥疑似經常欠債，甚至連公屋租金都要拖到上法庭。思琦今鋪又揀錯郎，想靠男友上岸，這些機會不是你囉！
楊思琦自爆分手後，同李家互相數臭，精采程度拍得住鋒芝婚變。思琦以為搵到金龜，不惜冒險孤注一擲即棄九年舊情，可惜投資可升可跌，今鋪分分鐘買大開細。
屢遭追債
33歲楊思琦，曾言自己年紀唔細，想組織家庭有小朋友，又話男友豪仔家庭經常要佢倒貼，反而新仔吳帥不但對佢照顧有加，兼同佢屋企相處得嚟。
表面睇吳帥似乎係筍盤，但本刊發現 31歲前香港跳水隊員、現在貿易公司打工的吳帥，並非什麼富二代外，更原來有多次欠債紀錄，除日前被揭 06年曾欠人 3萬蚊，搞到入稟小額錢債審裁處追數外，本刊更發現另一同名男子分別在 05、 06及 07年拖欠房協租金，其中 07年更只因三千多元而鬧上法庭。
微博現身
一直只聞名不見人的吳帥（ Andy Ng），卻有網友在微博上載了一張他與思琦兩母女在南京購物的相片，真身終曝光。網上圖片
《蘋果日報》圖片
根據小額錢債審裁處紀錄，一名叫吳帥的男子曾分別於 06年遭入稟追索 3萬元債及於 05、 06和 07年遭房協追討租金。
香港代表
今年 31歲的吳帥曾經代表香港出席參與大型跳水比賽，但在 02年被香港泳總指違反紀律，自此退出香港跳水界。《蘋果日報》圖片
思琦：冇大肚
有傳思琦向無綫告假 9個月安胎，但思琦親口證實並未懷孕，週日（ 10日）仍然要為無綫節目《寵愛有家》拍攝外景。《蘋果日報》圖片
疑似吳帥屢被追債，之前盛傳思琦懷有吳帥骨肉，好在日前楊思琦除承認新歡吳帥身份外，更堅決否認懷孕傳聞，「我冇大肚！我咁講係想佢（豪仔）死心，我好蠢，我唔知點做先可以令佢死心，惟有講同人哋有咗 BB，只想大家都可以有新生活。」慶幸思琦妹唔係有吳種，有乜唔對路，起碼仲走得郁呀！
鼎爺再插：
臭嘅就認命囉！
上週四（ 7日）鼎爺陪同飽受情傷嘅豪仔出席《拳王》煞科宴時，火滾爆粗鬧思琦：「佢嵋家屈 X我哋呀！」週一（ 11日）本刊致電鼎爺時火氣未減，講到新歡吳帥原來窮過豪仔，爭人周身債，仍然勞氣噴火回應。
（吳帥經常俾人追債喎！）咁就只好怪佢本人喇，公道自在人心，如果係臭嘅，咁佢惟有認命囉，呢個係佢嘅選擇，佢自己攞嚟。
如果佢搵番豪仔做朋友都 ok，但話一齊番就點都會有戒心，唔鍾意囉。
日後喺 TVB見到，冇嘢 o架，佢同我打招呼咪 hi番佢囉，但係我哋呢啲老屎忽就唔會做主動嗰個啦，費事俾人話黐金糠
大孖開炮
分手後細孖李泳豪一直保持低調唔回應，反而大孖李泳漢唔知係咪愛弟心切，連日炮轟楊思琦，就連思琦埋怨屋企食安格斯牛扒時欠菜和麵包發脾氣，及思琦怒罵施明「食屎」都擺上枱講，大孖成功變焦點。
《蘋果日報》圖片
佢哋當我透明！（真實對白）
思琦勁數十宗罪
楊思琦眼見自己形象破產後，亦不甘示弱為求自保出招，喺 TVB《東張西望》及《明報周刊》訪問中都聲淚俱下，寃屈狂數李家十宗罪。
1.西貢愛巢自己畀
住西貢時，佢阿媽阿哥住樓上，而樓下個單位係我自己畀錢租。
2.搬屋我畀錢
西貢搬去九龍塘時，佢哋話我最多嘢，要我畀晒全屋搬運費。
3.天台滲水又係我
嗰陣天台滲水，佢哋話係我啲狗整爛，維修費幾萬蚊要我畀，我好委屈囉。
4.冇工人服侍
個工人淨係服侍佢阿媽阿哥，唔會照顧我。
5.當透明
我試過融入佢屋企，但佢哋當我透明唔理我。
6.亂掟我啲嘢
佢屋企成日亂咁掟我啲嘢，好唔尊重我囉。
7.多管閒事
佢阿哥差啲打斷豪仔隻手，我試過勸交，佢屋企嫌我多管閒事排斥我。
8.幫還咭數
佢攞晒成份人工幫補屋企，唔夠仲要簽咭，見佢還咭數好辛苦，我幫到一定幫。
9.唔尊重我屋企人
豪仔好迴避我屋企人，我覺得咁樣係唔尊重！
10.冇心結婚
佢話同屋企商量過年底同我結婚，但我完全唔知，冇人同我屋企商量，冇人求過婚。
吳帥戰友爆
思琦貪錢
俞越
楊思琦棄豪仔改投前香港跳水隊成員吳帥懷抱，不過吳帥隊友、曾被錯指為思琦新歡兼教育學院同學的俞越，卻曾爆思琦曾因貪財而主動追求。家族在上海從商的俞越曾說：「唔知佢係咪知我屋企有錢，好主動咁打電話畀我，仲寫埋情信添，佢參加港姐前都有問我好唔好參加，我覺得佢有啲貪慕虛榮，所以冇發展。」但事後思琦否認說：「我對佢都冇 feel！」
俞越曾是香港跳水隊成員，家族在上海經商，現他分別擁市值 710萬的北角富澤花園和市值 940萬的北角半山海峰園，果然有貨。