牛扒妹起底大家樂 為食男女爭贏陀地
2011年07月13日
Face
最夾台灣幫
湛琪清(Jessica）同何宜聰（ Ethan）年紀差成十年，但係兩個都有台灣血統，講廣東話又唔準，同聲同氣。
大家樂新一輯廣告 sell完住家飯再賣牛扒，片中男女主角講嘢唔正反而有新鮮感。
原來片中對為食男女名叫 Ethan Ho（何宜聰）同 Jessica Jann（湛琪清），聽聲未睇樣已經知佢哋唔係純種陀地，為食男去過日本做模，家陣殺入香港、為食女 Jessica就係美籍華人。問牛扒妹有冇興趣做 o靚模，她斬釘截鐵話：「我唔會剝衫 o架！」好少鬼妹仔咁保守喎！
廣告片的為食女主角係 21歲嘅 Jessica（湛琪清），雖然係 100%中國血統，不過喺美國出世自然滿身洋味。男主角就係 30歲嘅 Ethan，正宗台灣仔，讀大學嗰陣主修日文系，所以識講流利日文。兩人現時簽了鄒世龍的 Starz People，齊做 Carol師弟妹。 Jessica說：「都有百幾人面試，不過廣告商睇中我哋講嘢唔正，夠得意喎！」
再鋸牛扒
大家樂一連兩輯廣告已經出咗街，剛於上週出街的第 2輯廣告中 Ethan同 Jessica扮情侶，仲約去食牛扒。
歎住家菜
第一輯男女主角都只係同事關係， Jessica約 Ethan食飯， Ethan一句「我食住家飯」激嬲為食妹。
唔選港姐
喺美國長大嘅 Jessica，大學畢業之後，自己放相上模特兒公司網站應徵。問佢點解唔選港姐？ Jessica話：「我好怕講嘢，而且廣東話唔好，所以冇參選。」唔選港姐， Jessica更加冇興趣學師姐 Carol楊梓瑤咁剝衫做 o靚模：「我同佢哋唔一樣，大家路線唔同，唔可以比較，而且我身材都冇佢哋咁好啦，我唔會剝衫 o架！我更加唔會整容啦！我媽咪同婆婆實鬧我，佢哋唔鍾意嘅嘢，我一定唔會做。」為食女唔肯剝，為食男 Ethan就決定從台灣殺入香港博一博，其實未來港之前， Ethan亦去過日本發展：「台灣男 model生存空間好細，可以話係冇出路，我哋唔似啲女 model咁露吓事業線就有工作，不過我決心做呢行嘅動力都係因為林志玲，佢真係好靚。我喺今年 4月中先嚟香港，我畀咗個限期自己，如果香港真係唔適合我，可能會去韓國或者新加坡。」準備行勻成個亞洲， Ethan決心都好大喎！
美國長大嘅牛扒妹，嚟咗香港 1年多，之前仲參加咗 TVB嘅玩嘢節目《變身男女 Chok Chok Chok》，她說：「我一向都好男仔頭，好似傻大姐咁，其實扮男仔都好好玩 o架！」
去年 10月， Jessica拍咗個 PPS繳費靈廣告，不過點都不及家做牛扒妹多人談論囉！
做過日模
喺日本時， Ethan除咗做平面模外，亦拍咗個 Sony相機廣告，佢話呢個廣告係香港廠商去日本試鏡，打算搵日本人拍，點知搵咗佢，話佢似日本人喎。
騎呢廣告夠創意
每年 TVB都會舉辦《最受歡迎電視廣告大獎》，不過有最佳廣告亦唔少得一啲比較「騎呢」嘅廣告，有啲真係睇完都唔知佢講乜。除之前有爆笑廣告「呢啲加茶」，近期仲有幾個廣告都真係幾「別出心裁」。
劉家昌仔齋坐
四洲集團最近同劉家昌個仔劉子千拍咗個廣告，劉子千就淨係坐喺梳化度，郁都唔郁。有好多網民都話睇完都唔知講乜。據四洲發言人高小姐話：「四洲為慶祝 40周年，贊助埋劉子千出新碟，因為四洲主席同劉家昌份屬好友，所以贊助埋佢個仔啫！」
金剛估歌仔
金剛最近幫豐田拍咗一連三輯廣告，同樣都係講新款車嘅性能，不過冇字幕真係唔明佢講乜，豐田發言人李小姐說：「我哋都係睇中金剛嘅人氣同佢唔清楚嘅廣東話，等觀眾有想像空間，好似估歌仔咁！」
http://www.imdb.com/name/nm0417792/